Deur:-
Majoor C.P. de W. Crafford
Kaptein M. de W. Dippenaar
Majoor A.J. Potgieter
DEDIKASIE

Opgedra aan al die oud-lede van die Suid-Afrikaanse Polisie en hul eggenotes wat met verloop van jare deur swaarkry en leed ‘n stewige fondament vir die Mag gelê het waarop ons, die huidige lede, kan bly voortbou, met ‘n vonkel in die oog en ‘n glimlag op ons lippe;

EN

 Opgedra aan die Suid-Afrikaanse samelewing met al sy fasette wat toegesien het dat die Suid-Afrikaanse Polisie ‘n dienstige Mag word in staat om ‘n magtige diens te lewer.
DIE SKRYWERS
VOORWOORD
Daar is al beweer dat ‘n persoon net so ver in die toekoms kan sien as wat hy hoog staan op die skouers van sy voorvaders.  Hiermee word natuurlik tekenne gegee dat ‘n individu hom slegs as ‘n ewewigtige goed-gebalanseerde persoon kan handhaaf indien hy uit sy eie en sy voorouers se opgegaarde lewenservaring put.  Hierdie beginsel is in die besonder van toepassing insoverre dit ‘n organisasie soos die Suid-Afrikaanse Polisie betref.  Die polisiemag moet noodwendig met een voet in die verlede staan om ‘n effektiewer stap in die toekoms te neem.  Die bekwame polisiebeampte se mondering bestaan uit intellektuele vermoe, temperamentele geskiktheid, akademiese kwalifikasies, onkreukbare karakter, geloof en alles gemonteer op ervaring – sy eie en die van sy voorgangers.
Die reeks radiopraatjies van majoor Crafford en kaptein Dippenaar gee ons enigermate ‘n blik op die verlede van die Mag; ‘n verlede waarin baie van ons bejaarde lede so ‘n vername rol gespeel het.  Dit is dan ook net gepas dat die fondse, wat gein staan te word uit hierdie publikasie van die radiopraatjies, aangewend sal word vir die Suid-Afrikaanse Polisie Bejaardesorgfonds.
[Sien Nota: Afstand van Regte]
GENERAAL P.J. COETZEE, S.E.D., S.O.O., S.O.E., SD.
KOMMISSARIS: SUID-AFRIKAANSE POLISIE
DEEL HIERDIE BLAD